jueves, 4 de septiembre de 2014

UTMB 2014 (Ultra-Trail du Mont-Blanc). 29/08/2014.

168,7 km
9796 m+
34h51'31''


























Dedicáu a toles madres y suegres, que sí, que tamos flacos como perros de caza pero nun facemos más que comer, sinón cualquiera aguanta jejejeje


¿Un póker d'ases de carreres pel monte del mundu mundial?, nun dudo nin un segundu: La Travesera, l'Ultra Trail Castrón de Piloña (nun ye carrera pero... ¡hai que correr!), Zegama y l'UTMB
Siempre dixe que 100km yera'l tope que diba facer, que más ye una barbaridá y que nun puede ser ni mediu sanu, pero como dicía Tina la maestra, nun se pue cagar entre llambiones... Tenía los puntos pa preinscribime (hai qu'acreditar esperiencia previa n'otros ultras), una vez na vida había qu'intentalo y va y tócame dorsal nel sortéu, ¡¡Yá ta liada!!

 El coche del espónsor, igual que los reyes magos (papá, mamá y la cartera...), al pie de l'Aiguille y la Dôme de Goûter, del Mont-Blanc y de l'Aiguille du Midi.

Fartures d'entrenar y entrenar tol añu, y cuando paez que la cosa va bien, a un mes y pocu de la gran cita, caída tonta de la bici, talonazu col pie derechu y depués de descartar fisura y edema, la médica dizme que nun corra hasta'l 23 d'agostu mínimu (¡¡cojona!!, que la carrera ye'l 29!!, "en bici puedes andar, ¿ye mui llarga la carrera?", estooo, 168km... podéis imaxinar la cara que puso, nin gurgutió...).
Fartures y fartures de bici, 4 díes de correr un pocu (1, 2, 3 y 4, sí...), otru día de trote salchicheru en Chamonix y a ver que se puede facer.

 L'albarda y el dorsal preparaos

Voi pa la salida con tiempu y espero ellí mediu sentáu mediu echáu en suelu casi 2h, nun hai nervios, sensación de serenidá, yá ta tol trabayu fechu y solo queda disfrutar, un pasu detrás d'otru, sin parar, como me dicía Dani Ablanedo na Altitoy, sin calentase lo más mínimu nes subíes, guardando fuerces pa trotar tolos llanos y toles baxaes pa dir avanzando pocu a pocu...Ver veremos...



 Esto nun tien vuelta atrás...

20 minutos antes de la salida empieza a llover a calderaos, nun ta fríu y nun pongo nada de ropa, en cuantu temos corriendo va sobrar tou, o eso espero; comienza'l show, la música al altu la lleva, xente per toles esquines animando sin parar, el corazón desbocáu, tranqui, Jordi, tranqui, nun te calientes.



 Tramu rápidu a Les Houches, primera subida y primera baxada, la xente va nerviosa y la baxada ta mui mala, primeres culaes, yo a lo míu baxando despaciu, nun puedo permitime caer, el talón duel a cada pasu, sé que nun tengo nada pero nun puedo dar otru golpe nél.

 Llegando a Saint Gervais y...
 ...saliendo yá con Nico

Llegamos a Saint Gervais moyaos como pitos y tengo a Laura ellí animándome. De repente una cara conocía, Nico, el boticariu volaor, dizme que tire, que va dir más despaciu... la madre que lu parió!!!, casi nun soi a siguilu, nos tramos de correr y nes baxaes llévame col ganchu, yo diba tol tiempu controlando la respiración, sin apurame y sin abrir la boca, pero ahora vamos un pocu más alegres y tou y así nun damos callada jijiji

 Poniendo'l frontal en Les Contamines

Apuramos hasta Les Contamines sin sacar el frontal, y como ta lloviendo oscureció primero y llegamos allá prácticamente a palpu. Paramos a comer y beber en plan y arrancamos pa la primera subida seria del día al Col de Bonhomme. Voi mui bien p'arriba, paez que me cuesta menos qu'a Nico, pero ye llegar a los 2000-2200m y empezar a mareame, a bostezar y a nun dir, la puñetera altura tá afectándome, pero calma. La estratexa ye forrar bien nos avituallamientos y, en llegando a l'altura crítica, volver a comer algo pa qu'al llegar arriba yá té en vena y poder empezar la baxada concentráu. Nico baxa más fuerte, yo voi más despacín col talón d'aquella manera y lo que fago ye parar menos nos avituallamientos pa volver a salir los dos a la vez. Les Chapieux, control de material, otra vez a comer y a beber y arrancamos per una carretera p'arriba que paez que nun tien fin hasta que nos desvíen a la derecha camín del Col de la Seigne, baxamos al Lac Combal y paez que voi garrando algo más de confianza na baxada. Nel avituallmientu ta'l gran (aunque roín d'estatura) Zígor Iturrieta: "¿qué coño faces equí tovía?", lleva 2h na carpa de primeros auxilios a medicamentos pa cortar los vómitos, pero tá con un platu sopa na mano sonriendo y "por mis cojones que le doy la vuelta al monte este, porque a eso hemos venido, ¿no?, y si me veis parar me arreáis con los bastones". Dichu y fechu, siguió y tovía llegó a meta en 29h y media, guapu'l  xestu de nun tirar la toalla y de siguir pese a que yá nun yera la so carrera, como unu más.
Otra subida a la Arête du Mont-Favre onde llego un pocu xustu y llarguísima baxada a Courmayeur, la última parte ye pindia y h.odía de narices, pero yá voi con más confianza y voi adelantando a un montón de xente, ye cuantu menos peculiar lo mal que baxa la xente en xeneral. En Courmayeur parada a cambiame enteru, ta amaneciendo y paez que va facer bon día, así que merez la pena ponese guapu y quitar la moyadura. Nico arranca antes que yo, va mui bien y va facer una grandísima carrera, unes 32h al final, nun quiero frenalu más.
 Poniéndose guapu pa lo que queda

 Nico como un pincel

 Amanecer espectacular en Cormayeur.

 Y vamos a la carga, eso sí, manzanina en mano de postre...


Equí armé la cagada del día, de les de llibru de principiante que casi me cuesta tener que dexalo. Playeros nuevos, mesmu modelu y númeru que los que traía pero nuevos, como l'últimu mes nun pude correr usélos namás un día, y claro, al ponelos depués de 13h... Mancábenme nel empeine y na parte d'abaxu del pie, afloxélos antes de salir pero que si quies, a los 20' vuelvo a parar a ver si doi cola tensión de los cordones, sigo otros 5' y vuelvo a apretar/afloxar, llego al refuxu Bertone abrasáu, sigo pal refuxu Bonatti y un pocu antes, yá desesperáu, quito los playeros, pongo los pies arriba una piedra y llamo a Laura: "últimu intentu, voi volver a ponelos y si siguen mancándome como hasta ahora n'Arnuva tengo que dexalo, nun puedo siguir otros 80km con esta tortura, llámote en media hora a ver qué fago pero la cosa pinta mal". Mecagonlavillorando!!!, tol añu preparando esto con tantu empeñu y tanta ilusión, voi mui bien físicamente y que la voi cagar por esta pijada... Milagrosamente vuelvo a calzame, aprieto los cordones lo xustu y paez que s'acabaren tolos problemas, sigo hasta Arnuva y na baxada adelanto bastante xente, como, y al arrancar p'arriba llámame Laura: "de momentu esto va, sigo, vémonos en Champex".
La subida al Grand Col Ferret faise eterna, llevamos yá 95km encima y eso paez que non, pero nótase... A cambiu, agora que los playeros dexaron de martirizame, les vistes al macizu del Mont-Blanc y al valle que baxa a Courmayeur son impresionantes. Adelántame tol mundu, pero voi tranquilu, hai que guardar pa trotar tolos llanos y toles baxaes voi diciendo pa mí.
Llego al marcianu Col Ferret, impresionante, toi de velu nos vídeos d'otres ediciones y agora soi yo'l que ta equí, danme un par de respigos y sin entreteneme arranco p'abaxu, dirección La Fouly. Baxada llarga pero voi garrando xente, muchos yá van caminando polo que valen, nun-yos queda nada... Yo voi concentráu en dir trotando tolo posible, avanzando, avanzando, avanzando... Tropiezo con José Vicente Benito, que ta d'espectador, charramos un par de minutos y sigo.




 Llegada a La Fouly, preciosu.

En La Fouly ta Laura, dizme que voi con mui bona cara y que me ve corriendo con mucha soltura (pa les altures de carrera que llevamos, nun vayáis a pensar que diba a 3'30''/km...). Toi de la sopa y del salchichón de los avituallamientos hasta les narices (los avituallamientos de 5 estrelles, nun fai falta casi llevar nada, algo pa meter al estómagu una hora depués de cada avituallamientu y pocu más) y pído-y a un rapaz que ta ellí que me saque un bocata cecina de los que llevo atrás na mochila, ye de Castellón y nun da créditu: "a ver si crees que se puede venir a correr esto con barrites y xeles namás", fartura risa y arranco como un tiru pa Champex, voi con fuerza, cómodu y cola moral alta depués de solucionar la crisis de los playeros. Pica p'abaxu y voi corriendo tou sin parar.

 Siguimos, ¡¡coime, qué guapu ye esto!!



 Adelanto a tres corredores autóctonos y nun se por qué, quédenme grabaos los playeros y les mochiles que lleven. Sigo adelantando xente y al llegar a una especie de morrena, la Crête de Saleina, hai un control sorpresa, vienen dos de la organización caminando en contra nuestra col llector de dorsales, con tan buena suerte (pa ellos, claro) que xusto depués de pasar el control vuelvo a adelantar a los 3 tipos d'antes y a mí nun me adelantó nadie: o bien garraren un atayu o alguien los llevó en coche, en fin, a mí dame igual quedar 3 puestos o 30 más alante o más atrás, pero paezme una falta de respetu intolerable hacia los demás, hacia la organización y hacia l'espíritu de la carrera. Mirélos un pocu torgáu de la que los volví a pasar y los tipos en vez d'agachar la cabeza tovía sacaren pechu y aceleraren el pasu pa intentar que nun los pasase, pero yo venía encendíu y enseguida los dexé atrás.
Sigo baxando ente pueblinos preciosos pero per asfaltu, ¡¡vaya recalentón de pezuñes!!, y de repente subida a Champex. Coincido con Isma, de Cercedilla, y yá siguiremos xuntos hasta casi'l final.

 Llegando a Champex

 Una vez en Champex, avituallamientu gordu y quédennos 3 subíes de casi 1000m+ cada una y tres baxaes, tamos nel km 122 y aunque ye una barabaridá lo que llevamos (3 maratones) y lo que tovía queda (otru maratón abundante), sabemos qu'esto acabámoslo sí o sí, aunque sea a rastru, ye cuestión de dir de subida en subida y de baxada en baxada, cuidar bien el beber y el comer y nun cebase col ritmu de nadie.

 Isma y yo camín de Trient

El tramu en llanu depués de Champex ye interminable, pero la subida, ¡ai la subida!, un arrastraderu de troncos infame con una pendiente que mete mieu y que nun s'acaba nunca. Cuando por fin llegamos arriba, la baxada tamién ye eterna, pero malísima, piedra, barru, raíces... Nun sé por qué tol mundu diz qu'esta carrera ye tou caminos anchos y corribles, estes tres últimes baxaes son mui técniques y de dir mui concentráu, a pesar d'ello, vamos como tiros adelantando a mucha xente.



 Con Isma camín de Trient, les fotos son d'él, que tuvo moral de llevar cámara

Trient, 139km y siguimos corriendo, nun sé cómo, pero siguimos...

Trient, sólo 2 subíes y 2 baxaes, salimos p'arriba al oscurecer y al peazu pásanos un corredor catalán con un chaval y una moza que nun lleven dorsal y que van tirando d'él hasta facelu casi reventar, cosa que ta expresamente prohibía pol reglamentu... Esto como lo de los 3 franceses d'antes, la especie humana nun tenemos igua...

 Vallorcine, ¡¡¡paezco un demonión!!!


Na baxada a Vallorcine Isma va mediu apaxaráu y facémosla casi toa andando, tranquilidá, comemos bien y a pol final. Xúntasenos equí Jacobo, de Castellón, que lleva una rodiella tocada, y depués de llamar a casa pa tranquilizalos y que vayan pa la cama (lleven tol día pegaos al ordenador viendo como'l muñequín va pasando d'un puntu a otru del perfil) salimos pa La Tête aux Vents, primero mediu en llanu hasta'l Col des Montets y depués una subida mui pindia.

 Isma, Jacobo y yo a puntu de salir a polo últimu

Llegando arriba decido tirar solu, Isma para a comer, Jacobo a llamar a la muyer y yo toi garrando fríu y nun quiero facer esperar a Laura en Chamonix más de lo imprescindible. Despedímonos y decido apretar hasta La Flegère, pero amigu, esti tramu ye malísimu, caliza rota y embarrada, el camín mediu perdíu y muchu cuidáu con onde se posen los pies. Por fin una subidina a La Flegère, baxada a pinchu per una pista d'esquí mui pindia y cuando encarrilamos pal camín, más piedres, barru y raíces, h.oder, estos 8km van llevame qué sé yo cuántu. Al final salimos a una pista que paez que nun s'acaba nunca y depués de muchu bregar, por fin tamos de nuevu en Chamonix, son les 4 y picu la mañana y tovía queda xente animando.

TA FECHA!!!!




Putu chalecu de dios, ¡¡¡hubo que sudalu!!!

Mui contentu cola esperiencia, nun les tenía toes conmigo pol últimu mes que nun pude correr, pero ta claro que tolo qu'había entrenáu tenía que salir tarde o tempranu; gracies al entrenu y a que les circunstancies obligaben a dir más despaciu acabé mui bien físicamente, cansáu, eso sí, pero muchu meyor de lo qu'esperaba, nin tuve sueñu nin calambres nin nada, namás una periostitis na pierna izquierda por una arruga del trinomiu calcetu-malla-polaina, otra cagada de principiante...
Pa terminar, dicir que la distancia de les 100 milles ye una burrada, pero ta mui sobrevalorada y a la vez mui infravalorada, esplícome, con una bona preparación y siguiendo una trayectoria deportiva más o menos coherente ye perfectamente asumible, hai que conocese mui bien, saber el ritmu que podemos aguantar durante tantes hores pero sobre tou hai que dir mui concienciáu y con muches ganes; pero cuidáu,  nun se prepara nun añu nin en dos nin en tres sin arriesgase a nun poder terminar o a desgraciase de por vida...
Namás, pa los que me conocéis, sí, ye verdá, voi tar una semana sin facer nada, a ver si aguanto jejeje y por últimu y acabo, dar les gracies a tola xente qu'anduvo pendiente del ordenador desde casa, que voi enterándome que fuisteis unos cuantos, y dar les gracies a Laura, por aguantame tou esti tiempu y por faceme esa maravillosa asistencia en carrera.

 Colos cupones d'asistencia y el Pilar Bonatti del Dru argayáu detrás na terraza del apartamentu

¡¡Hai que volver a facer el Tour del Mont-Blanc en plan tranqui!!

Última vista al Mont-Blanc el llunes pela mañana al marchar pa casa, cayó una nevada curiosina


Perfil y tiempos de pasu









4 comentarios:

  1. Enhorabuena, Jordi!! yes el mejor ;) ...... este finde, pa celebralo, unos culetes de "prau monga"

    ResponderEliminar
  2. Hola. No pude resistirme a dejarte un comentario para felicitarte. Pese a los problemas con el pie, lo conseguiste. Esos entrenos de tantos años los tienes bien guardados en la saca !!!
    Una vez más enhorabuena.

    ResponderEliminar
  3. Enhorabuena Jordi. No sé si te acordarás, coincidimos cuando fuimos el año pasado los gallegos al Anillo, que Mosquera y yo también estábamos preparando UTMB, y este verano en Cuntis me comentó Avelino que ibas tú este año. Y veo que muy bien, así que a disfrutar el regustillo. Saludos.

    ResponderEliminar