Villamorey-Tolivia. 20/04/2013

Castrones: Miguel Ángel, Avelino y Jordi

24km

2538m+ y 2495m-

6h29'

 Recorríu:

Villamorey-Llampaces-Guanalón-Cogullu-Corbellusu-La Forcá-Peña Negra-Peña Mea-Collá Pel.luno-Les Meloneres-Tolivia

- Oye, ¿que ties que facer el sábadu que vien?

- En principiu nada, ¿por qué?

- Na, porque queremos dir  mi tíu Miguel Ángel y yo de Villamorey a Tolivia pel monte tou siguiendo'l cantu, si te animes...

Los dos corzos de Tolivia en plena acción

Con esta proposición indecente yá podéis imaxinar qu'esi sábadu pela mañana taba yo como un clavu en Llaviana pa ver la que teníen preparada esti par de dos; Velino pel teléfonu nun sabía (o nun quería...) dame munchos detalles, que sería pa echar unes 6 hores y que yera pa xuntar el pueblu del güelu, José Mejido (Villamorey), col de la güela, Honorina Alonso (Tolivia), asina que la intriga taba servía.
Yá en coche camín de Villamorey enséñenme la cresta pela que vamos dir, automáticamente pónseme la sonrisa na cara de les grandes ocasiones y que nun se me va quitar nun par de díes: esta ruta va ser de les de 5 estrelles, recorríu espectacular, técnicu y montañeru a más nun poder.

 ¡¡Coño!!, ¿pero yera pa facelo pedaleando o corriendo?

Saliendo de Villamorey, enfrente'l Llampaces, primera cumbre del día



Pela mañana ta fríu, pero'l día promete y muchu

 

Salimos dirección al Torreón bordeando l'embalse de Rusecu, pa salir del pueblu yá nos perdimos... 

 Un pocu antes del Torreón, garramos y tiramos de frente p'arriba per un cantucu llenu robles mui guapu

Na cresta, terrén nel que nos moveríamos casi tol día. 

 Vistes dende'l Llampaces: Villamorey abaxu, al fondu del tou y  nel centru la foto, Les Vízcares.

 El Crespón, tola cresta que tenemos per delantre, a la derecha al final de la cresta y dándo-y el sol, el Guanalón, y más atrás y a la izquierda el Retriñón.

   Y más a la derecha Mea, ¡¡¡buff, tou lo que queda!!!



Los guías, Velino y Miguel Ángel, ¡¡vaya par de castrones!!



Vamos dexando'l Llampaces atrás, la cresta que tamos recorriendo ye impresionante; al fondu, d'izquierda a derecha: Trigueru, Breza y Xamoca, atrás del tou a la derecha El Sueve.

Fauna un tantu peculiar la qu'hai n'El Crespón...

Reponiendo fuerces, esto ye compenetración y lo demás cuentu jejeje

En primer planu el Guanalón, hacia la izquierda El Cogullu, Corbellusu y tirando otra vez pa la derecha, La Forcá, Peña Negra y Mea xustu detrás y a la izquierda del Guanalón

Tola xerra d'El Crespón que venimos dexando atrás, en primer llugar el Guanalón, al fondu a la derecha (como los baños jejeje...), Facéu

Cumbre d'El Cogullu, al fondu Mea

Subida al Corbellusu, comu diría Marco'l de Valle parafraseando a un ilustre piloñés: "¡¡siempre vais pelo peor!!". Equí, más arriba de lo que se ve na foto, ta'l pasu más complicáu del día, tien mala caída y mal agarre, muchu ojo pa quien tenga vértigu, nun té de metese en berenjenales d'estos o nun té de pasos d'agarre tapineru, ye lo típicu que si nun tas d'ello pues pasalo realmente mal o incluso trabar y nin p'alantre nin p'atrás...val más rodear y dir pela foz de Corbellusu

Camín de La Forcá (a la derecha) yá per bon terrén...

...aunque dalgo había que fozar ente cotolles...

El Retriñón

En La Forcá, Peña Negra y Mea a tiru

Furacu...

...cumbre...

...y vistes (valle del ríu Ayer)...

...en Peña Negra (al fondu Ubiña)

 Vistes dende...

...Peña Mea

Los tres castrones nel puntu más altu de Peña Mea, el Picu Dubil. Abaxu a la izquierda vese Tolivia.

El Furacón

Na Collá Pel.luno camín de Les Meloneres

La impresionante Peña Mea

Tolivia, fin de trayectu.

Como podeis ver esto nun ye'l típicu entrenu d'eso que llamen agora "trail running", ye una ruta montañera de verdá, onde hai que mirar mui bien onde se pisa, con algún qu'otru pasucu comprometíu y con dellos otros con ambiente, bastante aéreos; quiero dicir con esto, nun ye recomendable metese a facelo si nun se tien experiencia nesti tipu de terrenos nin por supuestu sólu o sin dir con alguien que lo conozca bien, asina qu'equí tenéis el track pero cuidadín...

 Tamién dicir que nun fuímos a batir ningún récor pero ficímoslo a un ritmu bastante alegre, así que 24km y 2500m+ en 6h y media, echái cuentes de comu ye'l terrén...Como contrapartida ye un recorríu elgantísimu con unes vistes impresionantes que nun va defraudar a ningún amante de la montaña n'estáu puru.
¡¡Ah!! y el bonito que nos preparó Honorina pa reponer fuerces, ¡¡espectacular!!; y José cuando-y contamos per onde subimos al Corbellusu quiso matanos: "¡la madre que-vos parió, pero si eso ye malísimu!"
Asina qu'esta ruta ye un pequeñu homenax pa ellos, que tantes veces anduvieren per estos sitios y non precisamente por viciu como nosotros, y por llevar más de 60 años casaos, ¡¡¡y que sean munchos más!!!

Panorámica

Perfil