martes, 24 de julio de 2012

Cordillera BTT 2012 Día 1 Puertu de Zarréu-Valle de Lago

62,1 km
2811 m+
2947 m-
9h


Después d'un par d'años, a Iván y a Furu apetecióse-yos volver a facer la travesía de la Cordillera Cantábrica en bici. Daquella tuvieren que facer algún tramu per carretera a cuenta'l mal tiempu y quedó-yos pendiente volver a facelo pel monte, con meyor tiempu y acabar la travesía en Piedrasluengas.
A mí, por compromisos gaiteros nun se m'arreglaba facelo del tirón con ellos, pero acompañélos durante les 2 primeres etapes, casi la totalidá de la 3ª y durante la 5ª y última.
El primer día arrancamos d'Infiestu a eso de les 7 la mañana, corte de carretera polos mineros en Cornellana, un par d'hores paraos comiendo como gochos pa pasar el tiempu y cuando llegamos al Puertu de Zarréu, "coño, podíamos comer yá y asina después nun echamos tiempu". Total, qu'arrancamos a pedalear a les 13, como los señores. La cuenta si nun fuera porque, sin duda alguna, ye la etapa más técnica y complicada de toes, nun ye la más llarga en kms, pero tela... a pesar de qu'una guía de cuyo nombre no quiero acordarme diz qu'hai 2,7 kms non cicletables, la realidá ye que son bastantes más los qu'hai que llevar la bici de ramal...
Al pocu d'empezar, llegando a Brañas d'Arriba, yo más contentu qu'unes castañueles con una cubierta trasera nuevina de paquete (WTB Prowler MX UST de 26X2.1, al día siguiente puse otra igual tamién a estrenar y pasóme exactamente lo mesmu, les llantes son unes Deore XT y puse 3 bares de presión el primer día y 3,5 el segundu, esa cubierta nun sé si ye bona o mala pero pa mí nun la quiero, polo menos nesa medida tien mui pocu perfil y llanta a la mínima, porque nun fue faciendo'l cafre nin muchu menos), llantazu, furacu na cubierta que nun sella'l líquidu y a parar a poner una cámara, como díbamos bien de tiempu...
Un peazu después ye Furu'l que tien que parar a poner cámara por una tayada nun flancu de la cubierta que'l líquidu tampocu quier sellar. La llei de Murphy ta cumpliéndose, cagonsumadre, entre un pinchazu y otru, otra hora a tomar pol sacu.
Interminable subida a El Cabril y recíbenos el borrín y l'orbayu p'acompañanos hasta'l final de la etapa. Dende'l colláu de Cereizales tenemos una baxada bastante técnica pa llegar a Braña Viel.la, onde ta esperando un repechón cortu pero duru al tener que llevar la bici de ramal durante casi unos 200 m de desnivel
Llegamos a La Peral a toa pastilla porque nun sabemos si nos va dar tiempu a llegar de día y a Iván nun sé-y ocurre más que facenos atayar una curva de la carretera per una pista qu'en casa col Google Earth vese mui ancha, porque "así atayamos, ho!", arranca la cosa mui bien pero enseguida empieza a tomase de maleza, piedres y agua hasta más arriba del tobillu, menudu atayu!!! Enfocamos la subida a la Braña de Mumián (según l'artista de la guía ye una trialera difícil toa ciclable menos un escalón rocosu al final, quisiera velu yo subilo montáu...).
Baxamos a Coto y vistu que yá ye casi de noche decidimos subir a Valle de Lago pela carretera, pel camín va oscurecenos fiju. Subida a tope que paez un final d'etapa del Tour y llegada a les 22:00 en puntu con una  h.odía y una moyadura considerables. Una bona fartura de picadillo, vino y chupitín d'arándanos y pa la cama, que mañana... mañana a ver si nun llueve otra vez...



Empezando'l día a la una'l mediudía...



Primer portéu cotolleru a la media hora de salir
 

Y entama'l borrín...

Tu mira'l mapa y yo'l gps...

Col tubeless yá nun nos acordábamos de lo que yera parar a iguar pinchazos...

¡¡¡Qué tiempos!!!



Furu hinchando la rueda y yo quitando cabarres...

Baxando a Xenestosu
 

...pero al final en Sonande a poner cámara tamién

Subiendo a La Mochadina



Portéu...



 

...y tramu cotolleru bien prestosu




Baxando del colláu Cereizales



Braña Viel.la

Llegando a La Peral

De La Llamardal a...

...la Braña de Mumián

Llegamos, a les diez de la noche, pero llegamos...

Perfil


Datos
 




Cordillera BTT 2012 Día 2   Valle del Lago-Busdongo (intento fallido, pa Boñar)

Cordillera BTT 2012 Día 3 Puebla de Lillo-Posada Valdeón

Cordillera BTT 2012 Día 4 Posada Valdeón-La Vega

Cordillera BTT 2012 Día 5 La Vega-Laguna Negra-Ojedo



No hay comentarios:

Publicar un comentario