miércoles, 15 de junio de 2011

Canfranc-Canfranc. 11/06/2011

42 km.
4000 m +
5h48'29''


Después d'unos añinos oyendo falar d'esta supercarrera (los paisaxes y les cifres de desnivel meten mieu!!), por fin arranco p'allá. Trabayo'l vienres pela mañana, como rápido y pa Canfranc, llegamos después de 6 h de coche y vamos a pol dorsal, primer gran detalle por parte de la organización, cena pa tolos corredores y acompañantes nel polideportivu. Saludamos a unos cuanto conocíos, cenamos, tomamos una cañina,  preparamos los trastos pa mañana y pa la cama. Pela mañana ta fresquín, les previsiones falen de 14-15º de máxima durante'l día en Canfranc (1100 m) y como vamos subir hasta 2500 m y vamos tar bastante tiempu rondando los 2000 m salgo de manga llarga. Llevo una riñonera con 2 botes de 300 ml con agua y sales, otru botellín de 330 ml con un xel disueltu n'agua, 4 onces de chocolate negru, 2 barrites, un par de xeles y otru sobre de sales, va ser una carrera llarga y dura y convién dir bien preparáu, amás después del descalabru a base de calambres en Zegama tengo bien claru pa una bona temporada que nestes carreres, aunque hai que dir colo mínimu tampocu hai que pasase col minimalismu...
Na salida veo que van a correr unos cuantos galgos especialistes nesti tipu de carreres de les de verdá, tán Adolfo Aguiló, Óscar Pérez, Samuel amás de Salvador Calvo y Pablo Criado que vienen de facer una bona barbaridá el fin de semana pasáu, El anillu de Vindiu, en Picos, 110 km, 9000 m+ y casi 30 h non stop, tovía nun consigo explicame cómo una semana después vienen a Canfranc y tovía facen un carrerón espectacular los dos, encima al día siguiente marchen pa Fuente De a correr el km vertical... sin comentarios...
Tamos tres asturianos, Copete (Oxígeno), Javier Palacio (Avientu) y yo (Vízcares), y tamién ta Agustín Tornero de Valladolid, "Mortadelo", l'animador por excelencia de les carreres, paez que nun nos vamos aburrir.

Después de guardar un minutu de silenciu por Armando Grasa (miembru de la organización de la carrera), a les 8:00 en puntu salimos.

La verdá ye que toi un pocu acoyonáu cola dureza de la prueba pero, aunque salgo tranquilu, paez que nadie quier tomar la iniciativa y al final... véome yo tirando del grupu, qué raru...

Canfranc detrás, al pocu de salir dirección a La Moleta, 1500 m+ pa empezar...

Pocu a pocu va estirándose'l pelotón, cada ún va buscando'l so ritmu y nun ves a nadie faciendo ninguna xatada, polo que pienso otra vez más que la carrera tien que traéseles, después d'un peazu pasa Samuel a tirar, detrás míu vienen Copete, Salva, Mortadelo y Óscar. Aunque nun vamos a tope, el ritmu nun ye lentu (1000 m+ en 49'), y aunque paez que per esti caminucu que nun para de facer zetes nun subes nada, cuando mires p'abaxu y ves Canfranc ehí empozáu daste cuenta que vas ganando altura sin parar. La última parte de la subida ye tou entre peñes, ta marcada con banderines en diagonal hacia la derecha, pero Samuel, que conoz la zona a la perfección, tira per una canaluca de frente. Yo por si acasu voi per onde les banderes, nun vaya ser que me llamen l'atención, coronamos La Moleta Samuel el primeru, yo después (en 1h14'30''), Copete, Salva y Óscar. El primer tramu de baxada ye común col de subida, colo que cruzámonos colos que van subiendo: "Venga p'arriba que queda pocu!!!", "Venga p'abaxu, máquinas!!!", intercambio l'estribillu de Guantanamera con Mortadelo (inevitablemente cambiamos la lletra jejejeje)y p'abaxu; siento baxar detrás míu a Salva destapinando: "Suave, suave, que vas matate!!!", "Venga, Gaiteru!!!", el mui castrón va descoyonáu de risa, intento tirar detrás d'él pero queda muchu y ta baxando fuerte, asina que yo a lo míu. Al peazu, después de pasar Fuente Elvira veo que garra a Samuel y que lu adelanta. Pasamos la Caseta del Vasco, la Caseta de La Cueva, pasamos un tunel bastante llargu nel que solo ves la salida, polo qu'al nun ver ónde pises vas con un pocu de mieu de pegate un gochazu y después de Picaubé llegamos al avituallamientu del Fuerte del Coll de Ladrones. Esta baxada ye per un senderucu que va faciendo zetes sin parar, per enriba de muries pa parar les avalanches, na parte final acercóseme Óscar y apreté un pocu más, y nun tramín había una cadena pa garrase, "¿qué coyones fai equí esta cadena si nun ta tan maluuuuuuuu..." culada explicativa, túvome bien, por listu...
Como mediu plátanu, relleno un bote con acuarius, bebo lo que sobra de la botella de mediu litro y pa La Raca, a por otros 1000 m+. Dícenme que Salva pasó 3'30'' antes, asina que paez que nun me sacó tantu nesta baxada.

Avituallamientu del Fuerte del Coll de Ladrones

Salgo con Óscar del avituallamientu y pocu a pocu va descolgándose, vamos durante un tramu pel camín de Santiago y después enfilamos a pinchu pa La Raca. Veo a Salva y a Samuel delante, Óscar y Copete un peazu detrás y de repente apaez unu de verde subiendo como una moto (Jon, al final llegó'l segundu) que pocu a pocu gárrame y pásame. Mirando pa la derecha y p'atrás vese La Moleta, acoyona ver per onde acabamos de subir y baxar y lo que tovía queda...

Llegando a La Raca, detrás vese El Tobazo y Estiviellas (per onde vamos a pasar más tarde) debaxu d'El Sombrero y el Picu de Aspe

Canfranc a la izquierda ellí empozáu...

Candanchú a la mio derecha a tiru piedra

Salva pasó va 5-6 minutos, Samuel va unos 4 y Jon debe sacame un minutu, los voluntarios que tán nel picu ofrécenme agua que por supuestu nun rechazo y danme ánimos, tola xente vuélcase con nosotros y son amables y simpáticos, polo qu'intento corresponder soltando alguna pijada. Baxamos agora peles pistes d'esquí d'Astún, bastante pendiente y terrenu malu de pisar. Tengo un despiste coles banderes, retrocedo un cachín, párome a ver per onde ye y resulta que diba bien, pierdo un minutu o minutu y mediu pero veo qu'Óscar vien bastante atrás tovía, tranquilidá y p'abaxu, cruzamos un riega y vamos a dar a la carretera que baxa al puertu de Somport. Nesta baxada los d'alante sacárenme un mundu, fago aproximadamente un kilometrín pela carretera y llego a Somport, onde hai otru avituallamientu. Como un plátanu, acabo l'agua con sales que llevo y parte del acuarius y relleno los botes con más agua con sales que-y dexé preparáu a Laura (a la probe fíce-y cargar con una mochilada de comida y agua que pa qué...), como un cachu chocolate negru con almendres y garro les gafes de sol. Al salir del avituallamientu llega Óscar y un pocu detrás otru rapaz con camiseta colorada (Eneko, 4º en meta). Tiro pa Candanchú per un tramu mui guapu, sube, baxa, llanea, un pocu de fayadal, un pocu de campera...

Candanchú

Equí toca subir pela pista de la estación a El Tobazo, Óscar y Eneko vienen apretando pero consigo mantene-yos la distancia, algo más atrás paezme ver a Copete, que ta faciendo una bona carrera. Baxamos al Llano de Tortiellas Alto onde hai un control y al Ibón de Tortiellas (que ta prácticamente secu, ye una llamarga), nesta baxada Eneko adelantó a Óscar y al empezar la subida al colláu d'Estiviellas téngolu pegáu a mí, Óscar recortóme tamién un bon cachu nesta baxada. Toi cansaducu yá (van casi 5 h de carrera...) pero voi bien, aunque paez qu'ellos van algo meyor. Esta subidina la verdá que suple bastante, ye de piedra gorda suelta y mui pindia y paez que son más metros de desnivel de los 350 que realmente son, pero bueno, aprieto los dientes y p'arriba. Na última parte de la subida pásame Eneko y al empezar a baxar failo Óscar, intento siguilu, pero zarapico nun cañu y casi voi al suelu, voi tovía un pocu espesu de reflexos d'acabar de subir y déxolu tirar, él lleva corriendo toles ediciones y calculo que va baxar a dalo tou ya que conoz el terrenu. Echo cuentes y voi el sextu y calculo que baxe de les 6 h en meta, pa mi ta de sobra, asina que tranquilín, pero mientres toi cabilando apaez otru detrás (Joseba) con pinta de querer ganar un puestu, ah non, otru más yá si que non!!!, yo que contaba baxar tranquilu...menudu estrés!!!, los 39 minutos de baxada desde'l colláu d'Estiviellas a Canfranc a tope y col d'atrás a menos de mediu minutu. El caminín vuelve a facer zetes sobre muries de piedra y cruzámonos prácticamente en toes, yo pela d'abaxu y él pela d'arriba, cada vez que podemos saltar y recortar alguna facémolso sin miramientos, vamos col cuchillu entre los dientes. Entramos nel bosque y equí ye más complicáu recortar, nun sabes seguru si lo qu'hai debaxu ye'l camín qu'hai que siguir o si ye otru, hai que tirar de sextu sentíu y agudizar bien la vista pa ver les cintes, nun vaya ser que nun recorte pierda'l camín. Nestes condiciones paez que la puñetera baxada nun termina nunca, n'algún claru vense los edificios de Canfranc pero paez que cada vez ta más abaxu...
Por fin salimos a la calle principal del pueblu y el final ye d'infartu: 4º, 5º, 6º y 7º viéndonos unu al otru, con un minutu y 25 segundos de diferencia entre'l 4º y el 7º, toos apretando más pa nun ser garráu que pa garrar yá a nadie, increíble llegar tan apretaos nuna carrera tan dura...

Entrando en meta con Joseba pisándome los talones

Copete llega en 6h02'20'' y Javier Palacio en 6h32', bon papel el de la representación Astur. 
La carrera la verdá que ye una pasada, los paisaxes, la organización, los desniveles...yo contaba sufrir bastante más y la verdá que fui mui cómodu, también ye verdá que fui reservón desde'l principiu y nun apuré nes baxaes a nun ser na última, tamién los desniveles nun son tan agresivos como los que tenemos per equí, ye raru que se suba o baxe a pinchu, son tou caminucos que van faciendo revueltes sin parar y tampocu hai tramos técnicos técnicos (la parte alta de La Moleta y pocu más), pero nun cabe duda qu'hai una burrada de metros de desnivel y que pasen factura y que ye una carrera montañera de verdá, hai muches carreres que se llamen de montaña que nesi mesmu kilometraxe puedes tardar tranquilamente un par d'hores menos, incluso más...

Copete dando cuenta d'un bocata xamón y yo d'una cerveza, sí, sí, nel avituallamientu de meta teníen de tou

La estación de Canfranc pela tarde con La Raca al fondu

Barrancu d'Estiviellas, la última baxada de la carrera

Lo que mediu se ve detrás de la estación ye la parte baxa de La Moleta

Al final, como había troféu pa los tres primeros de la clasificación absoluta y pa los tres primeros de cada categoría y nun yeren acumulables, rascamos podium y tou, lo que pasa que como Eneko y Óscar nun pudieren quedar a la cena, la foto del podium quedó un pocu rara...

Parte de l@s voluntari@s y de la organización, est@s sí que merecen un premiu

Y otru detallazu, cena otra vez pa corredores y acompañantes


Al día siguiente contábamos subir al Garmo Negro, onde tuvimos en xineru una expedición de castrones n'esquís, pero al llegar a Baños de Panticosa veo que'l colláu d'Argualas tien tovía un montón de nieve, pregunto nel refuxu y dícenme que'l día anterior subió xente con crampones y que taba bastante duru, asina que como nun traemos los fierros cambiamos de planes y vamos pa los Ibones de Bachimaña, onde tamién habíamos estáu'l día después de subir al Garmo Negro.

Baños de Panticosa desde'l camín que remonta'l ríu Caldarés

Esti valle ye preciosu

Ibón Azul Baxo colos Picos de l'Infierno y el Garmo Blanco encima

Ibón Azul Alto de l'Infierno col Cuello Tebarrai y el Pico Piedrafita detrás

Desagüe del Ibón Azul Baxo

Ibón Alto de Bachimaña

Después d'unes 6 h de monte pa soltar les pates, arrancamos a tomar algo, cenar y a dormir a Jaca, y aprovechando que'l llunes fue San Antoniu (patrón d'Infiestu), viaxe de vuelta pa casa con alguna parada turística.

Quien primeru acierte d'ónde ye l'ayuntamientu de la semeya siguiente tien pagada una botella sidra
(ta bien fácil, ¿o non?)

Perfil






Fotos:

Cróniques:







5 comentarios:

  1. Ayto. de Pamplona ¡¡¡gora San Fermín!!!, ¿cuándo la tomamos??? ;)

    ResponderEliminar
  2. Bingo!!!, cuando quieras, pero van pensar qu'esto ta amañáu y que ye tráficu d'influencies familiar...jejeje

    ResponderEliminar
  3. que piensen lo que quieran, pero de tráfico de influencias nada de nada!!! .... fueron muchos san fermines ;)

    ResponderEliminar
  4. Enhorabuena por tu carrerón!!!

    Y por la crónica también, va ;).

    Suerte en el Ribagorça.

    ResponderEliminar